Radio Purbi Rukum

एसइई पुरक परीक्षा : रुकुम पूर्वबाट २ सय ९९ विद्यार्थी सहभागी हुँदै

रेडियो पूर्वी रुकुम

रुकुम पूर्वमा माध्यमिक शिक्षा परीक्षा (एसइई) २०८३ को पूरक परीक्षा असार १ गतेदेखि सञ्चालन हुने भएको छ । राष्ट्रिय परीक्षा बोर्डले निर्धारण गरेको परीक्षा तालिकाअनुसार रुकुम पूर्व जिल्लाका २७ वटा विद्यालयका २ सय ९९ जना विद्यार्थी पूरक परीक्षामा सहभागी हुने भएका छन् । शिक्षा विकास तथा समन्वय इकाइ रुकुम पूर्वका अनुसार परीक्षामा सहभागीमध्ये प्राविधिक धारतर्फ २ जना तथा साधारण धारतर्फ २ सय ९७ जना परीक्षार्थी रहेका छन् ।

जिल्लाभरिका सबै परीक्षार्थीका लागि सिस्ने गाउँपालिका–५ स्थित रुक्मिणी माध्यमिक विद्यालयलाई परीक्षा केन्द्र तोकिएको छ । परीक्षा केन्द्र निर्धारण सम्बन्धी सूचना प्रकाशित गर्दै सम्बन्धित विद्यालय, विद्यार्थी तथा अभिभावकलाई आवश्यक तयारी गर्न अनुरोध गरिएको छ । शिक्षा विकास तथा समन्वय इकाइ रुकुम पूर्वका इकाइ प्रमुख तिलक गौतमले परीक्षा शान्त, मर्यादित र व्यवस्थित ढंगले सञ्चालन गरिने जानकारी दिनुभएको छ ।।