Radio Purbi Rukum

रुक्मिणी माविमा नयाँ विद्यार्थीलाई स्वागत तथा छात्रवृत्ति वितरण

रेडियो पूर्वी रुकुम

शैक्षिक सत्र २०८३ मा विभिन्न विद्यालयहरुबाट आई रुक्मिणी माध्यमिक विद्यालयमा भर्ना भएका कक्षा नर्सरीदेखि कक्षा ९ सम्मका जम्मा २८६ जना विद्यार्थीहरुलाई स्वागत गरिएको छ भने विद्यालयमा अध्ययनरत शैक्षिक सत्र २०८२ का १/५ का छात्रा तथा दलित विद्यार्थीहरुको हकमा छात्र–छात्रा गरी करिब १५० जनालाई छात्रवृत्ति समेत वितरण गरिएको प्रधानाध्यापक पञ्चबहादुर के.सी.ले जानकारी दिनुभएको छ ।

विद्यालय व्यवस्थापन समिति अध्यक्ष ओम प्रकाश थापाको अध्यक्षता तथा शिक्षक अभिभावक संघका अध्यक्ष गोपाल सुनारको प्रमुख आतिथ्यतामा सम्पन्न कार्यक्रममा नवआगन्तुक विद्यार्थीहरुलाई स्वागत गर्दै नियमित अध्ययन, अनुशासन तथा गुणस्तरीय शिक्षामा जोड दिन आग्रह गरिएको प्रधानाध्यापक के.सी.को भनाइ छ । कार्यक्रममा बोल्ने वक्ताहरुले विद्यालयको शैक्षिक गुणस्तर अभिवृद्धिका लागि अभिभावक, शिक्षक र विद्यार्थीबीच सहकार्य आवश्यक रहेको उल्लेख गर्नुभएको छ ।

वक्ताहरुले छात्रवृत्तिले विद्यार्थीहरुलाई अध्ययनप्रति थप प्रेरणा मिल्ने विश्वास व्यक्त गर्नुभएको छ । कार्यक्रममा विद्यालय परिवार, अभिभावक तथा विद्यार्थीहरुको उल्लेखनीय सहभागिता रहेको थियो भने कार्यक्रमको सञ्चालन शिक्षक घनश्याम दाहालले गर्नुभएको थियो ।।