Radio Purbi Rukum

रुकुम पूर्वमा अवैध तीन थान भरुवा बन्दुक बरामद

रेडियो पूर्वी रुकुम

रुकुमकोट । रुकुम पूर्वको पुथाउत्तरगंगा गाउँपालिका–१० स्थित नसिलेक जङ्गलबाट प्रहरीले अवैध भरुवा बन्दुक बरामद गरेको छ । जिल्ला प्रहरी कार्यालय रुकुम पूर्वका अनुसार आइतबार बिहान करिब ८ः५० बजे इलाका प्रहरी कार्यालय तकसेराबाट प्रहरी वरिष्ठ नायब निरीक्षक टेकराज भण्डारीको कमाण्डमा खटिएको ६ जनाको गस्ती टोलीले जङ्गलमा गस्ती गर्ने क्रममा ढुङ्गाको ओढारमा लुकाइछिपाइ राखिएको अवस्थामा बन्दुक फेला पारेको हो ।

प्रहरीले एउटा साबुत भरुवा बन्दुक र नाल मात्र भएका दुई थान गरी तीन थान बन्दुक बरामद गरेको जिल्ला प्रहरी कार्यालय रुकुम पूर्वका प्रहरी निरीक्षक लाल बहादुर विकले जानकारी दिनुभएको छ । बरामद गरिएका हतियारलाई आवश्यक कानुनी प्रक्रिया पूरा गरी जिल्ला प्रहरी कार्यालय रुकुम पूर्वमा ल्याइएको छ । घटनाका सम्बन्धमा थप अनुसन्धान भइरहेको जिल्ला प्रहरी कार्यालय रुकुम पूर्वले जनाएको छ ।।