Radio Purbi Rukum

रुकुम पूर्वमा वडा कप २०८२ अन्तर्गत भलिबल प्रतियोगिता सुरु

रेडियो पूर्वी रुकुम

रुकुम पूर्वको सिस्ने गाउँपालिका–६ मा वडा कप २०८२ अन्तर्गत खुला वडा स्तरीय पुरुष भलिबल प्रतियोगिता उद्घाटन गरिएको छ। आज चिउरेनी खेल मैदानमा आयोजित एक समारोहका बीच जिल्ला समन्वय समिति रुकुम पूर्वका उपप्रमुख मोहन बहादुर केसीले प्रतियोगिताको उद्घाटन गर्नुभएको हो । “राष्ट्रका लागि खेलकुद, स्वास्थ्यका लागि खेलकुद” भन्ने मूल नाराका साथ सिस्ने गाउँपालिकाको आर्थिक सहयोग तथा युवा खेलकुद कार्यक्रम सञ्चालन समिति सिस्ने–६ को आयोजनामा प्रतियोगिता सुरु गरिएको हो ।

प्रतियोगितामा प्रथम स्थान हासिल गर्ने टोलीलाई ८० हजार रुपैयाँसहित कप, मेडल र प्रमाणपत्र प्रदान गरिने आयोजकले जनाएको छ। त्यसैगरी द्वितीय हुने टोलीलाई ५० हजार, तृतीय हुनेलाई ३० हजार र सान्त्वना स्थान हासिल गर्ने टोलीलाई १५ हजार रुपैयाँसहित मेडल तथा प्रमाणपत्रको व्यवस्था गरिएको खेलकुद कार्यक्रम सञ्चालन समितिका अध्यक्ष हरी थापाले जानकारी दिनुभयो । प्रतियोगितामा कुल १४ टोली सहभागी रहेका छन्। (FIVE) को नियमअनुसार सञ्चालन गरिने जनाइएको छ ।

चैते दशैंको अवसर पारेर आयोजना गरिएको प्रतियोगिताको उद्घाटन समारोहमा प्रमुख अतिथि केसीले खेलकुदले स्वास्थ्य सुदृढ बनाउनका साथै अनुशासन सिकाउन महत्वपूर्ण भूमिका खेल्ने बताउनुभयो । कार्यक्रममा सिस्ने गाउँपालिका–६ का वडाध्यक्ष पूर्ण बहादुर मल्ल विशेष अतिथि रहनुभएको थियो। साथै वडा सचिव विष्णु विक, सुरक्षाकर्मी, पत्रकार तथा खेलप्रेमीहरूको उल्लेखनीय उपस्थिति रहेको थियो । कार्यक्रमको सञ्चालन टीका केसीले गर्नुभएको थियो ।।